Viloyat hokimligida bo‘lib o‘tgan video selektor yig‘ilishida Namangan viloyati mahalliy budjetining 2021-yilgi asosiy ko‘rsatkichlari muhokama qilindi.
2021-yil uchun “O‘zbekiston Respublikasi Davlat budjeti to‘g‘risida” gi Qonun loyihasi muhokamasiga bag‘ishlangan video selektor yig‘ilishida xalq deputatlari viloyat kengashi deputatlari, senatorlar, sohaga doir boshqarma va tashkilotlar rahbarlari ishtirok etdi.
Yig‘ilish ishtirok etgan viloyat hokimi Shavkatjon Abdurazzaqov mamlakatimizda qonun loyihalarini deputatlar ishtirokida muhokama qilish va ularning takliflari asosida qo‘shimcha va o‘zgartishlar kiritishga alohida ahamiyat qaratilayotganini ta’kidladi. Mazkur qonun loyihasi Prezident raisligida o‘tkazilgan video selektor yig‘ilishida ko‘rib chiqilib, parlament va mahalliy kengashlar deputatlari muhokamasiga qo‘yish, ularning takliflari asosida yanada mukammallashtirish muhim ahamiyatga ega ekani uqtirilgan edi.
Yig‘ilishda viloyat moliya bosh boshqarmasi boshlig‘i Zuhriddin Bahriddinov viloyat mahalliy budjetining 2020-yilda kutilayotgan ijrosi va 2021-yilgi asosiy ko‘rsatkichlari haqida axborot berdi. Kelgusi yil xarajatlar rejasida ijtimoiy sohalar ustuvor bo‘lib, buning uchun 2 trillion 255,9 milliard so‘m yoki budjetning qariyb 70 foizi yo‘naltirilishi ko‘zda tutilgan. Bu boradagi o‘zgarishlar Chust tumani misolida tahlil etib berildi.
Shundan so‘ng xalq deputatlari viloyat, shahar va tumanlar kengashlari deputatlari axborot yuzasidan so‘zga chiqib, o‘zlarining takliflarini bildirdilar. Viloyat hokimi bildirilgan taklif-mulohazalar o‘rganib chiqilib, shu asosda parlamentga yuborilishini bildirdi.
“Namangan viloyati mahalliy budjetining 2021-yilgi asosiy ko‘rsatkichlari to‘g‘risida”gi masala o‘zgartirish va qo‘shimchalar kiritilgach xalq deputatlari viloyat kengashi sessiyasi tasdig‘iga qo‘yiladigan bo‘ldi.